時裝編輯の養生手記：夏至袪濕茶，告別浮腫與疲態
入夏身邊不少女士都大叫救命，冬天仲話可以靠 styling 遮遮掩掩，夏天真係無所遁形。水腫係香港女性人生敵人，十個女士九個腫，因為我哋身處嶺南地區，先天性係比較潮濕；另外就係都市人飲食問題：夏天多喝凍飲，食刺身沙律等生冷嘢，又會食酸辣粉，酸菜魚，水煮魚… 濕熱底人食咗脾胃就火上加油，令大便黏爛，好似抹極都抹唔乾淨。另外，經常身處冷氣地方，少運動等… 以上種種都會令我地身體容易困濕，成日覺得好攰，身體又重又腫，濕疹仲會成日翻發，所以入夏，我通常每一至二星期煲一次袪濕茶，不但去濕健脾胃，仲有寜心安神功效。
袪水腫攻略 － 調較你脾胃：
夏至袪濕茶
材料：
雲苓 60 克
白术 30 克
扁豆衣 65 克
白芍 10 克
抱心茯神 60 克
蜜棗 3 粒
陳皮 一瓣 （陳皮一塊有三瓣，搣一瓣用）
做法：
將所有材料沖洗再浸 10 分鐘，13 碗水，水滾後加入所有材料，大火滾 10 分鐘，再轉細火煲 1.5 小時。
雲苓、白术，扁豆衣係家傳户曉既袪濕組合，屬平性，有健脾化濕功效，一家大細都飲得；白芍有益脾養肝功效；抱心茯神可以安神健脾；陳皮可理氣健脾。袪濕茶固然要袪濕，但「健脾胃」和「補氣」同樣重要！從中醫學角度，「脾主運化」，日常飲食要先經脾胃消化，再將水谷水液輸佈到身體各部份，另外佢嘅特點係「惡濕」，如果呢部身體入面嘅抽濕機出問題，影響氣血在身體流動，就會積聚痰濕，造成水腫、無胃口、四肢無力、大便軟爛問題，你再食幾多山珍海味補身都無用，因為身體根本消化吸收唔到。
咁點解要「補氣」？身邊有位朋友好努力袪濕，但仍然覺得好攰、大便軟爛，仲有時會肚瀉，要審視飲食之餘，其實有機會因為身體唔夠「氣」。「氣」、「血」、「津液」係構成人體和生命活動最基本和最重要的物質之一，氣可推動人體發育、溫暖身體、抵抗外邪、將食物氣化成氣血、固攝血液在血脈內流動，控制津液分泌和排泄，防止臟腑下移等等。當夏天汗多而又經常袪濕，水份大量排出身體，氣亦會隨津液排出，造成「氣虛」，令人經常提不起勁。
說到補氣，其實一年四季都要補！夏天補氣要用花旗蔘，好多人聽到「蔘」都耍手擰頭「太補呀！受唔到！」。花旗蔘屬涼性（唔係寒！！！），味甘帶苦，有降火，生津止咳、降疲勞、除煩燥之效，能治陰虛火旺；中醫食療有句話「不時不食」，唔係叫你冬天吃，日日吃，大量吃，在炎夏適量地煲花旗蔘湯飲下，對身體有很好的補氣功效，但僅記不要在晚上喝，提神補氣功效有機會影響睡眠嘅呢～
photo provided by Kay Chan
